أقسام المكتبة الادبية
 قصيدة مختارة:
 البحث في المكتبة الأدبية:
 الشعر الشعبي

المقالات عذبني درب الشام

القسم القسم: الشعر الشعبي الشخص الكاتب: السيد سعيد الصافي التاريخ التاريخ: ٢٠١٨/٠٧/٣٠ المشاهدات المشاهدات: ٩٣٠ التعليقات التعليقات: ٠

عذبني درب الشام

السيد سعيد الصافي

عذبني درب الشام

سهمك رماني

 

ما طبگ جفني ونام

آه يا زماني

 

 

 

يا زمن من عندك سبب كل بلواي

من زغري واتگابلت بالضيم اوياي

واجفوني ذبلت من كثر دمع ابچاي

ولمن وگع چافل اضعوني الوفاي

وعالنهر گلبي طاح

وكل الأماني

 

والأمل مني راح

آه يا زماني

 

 

 

جمر الغضه ابوسط الگلب حسراتي

صبن دمه من الفرك راحاتي

فوگ الوجن خلن أثر دمعاتي

اگضيت الليالي أتگلب بحسباتي

بالطف عفت هالروح

والهم ولاني

 

يمي لجساد اتنوح

آه يا زماني

 

 

 

من أمي كسروا ضلع من عندي اضلوع

وشگد صبر عندك يگلبي المفجوع

فوگ الرمح راس الحسين المگطوع

واعله الهزل مجتوفه لطفال اتلوع

أتفقد المضعون

غدرك سباني

 

لو سكّت اليبچون

آه يا زماني

 

 

 

شاب الگلب من الهضم قبل الراس

أتفقد الطفل اليطيح وينداس

لو أستر العيله من اعيون الناس

ومن ضربوا امتوني صحت يا عباس

يا اللي جبتني اوياك

ابشده تراني

 

هضموني خويه اعداك

آه يا زماني

 

 

 

من قطعوا اچفوفك يراعي الغيره

فوگ الهزل من ديره رحت الديره

شحچي وأمري صعب تفسيره

تنشدني عنك حين الطحت ابحيره

مني تريد اجواب

مدري اشدهاني

 

وآنه ابدمع سچاب

آه يا زماني

 

 

 

من عگب خدري وعزتي وذيچ الدار

لني بخرابه گاعده وبين أشرار

الصوب المدينه اتوجهت بالأنظار

يا جدي گوم انظر يطاها المختار

بس حرم والأطفال

ومحد رعاني

 

يا الهادي وبيا حال

آه يا زماني

 

 

 

اگضيت أربعين من الليالي يحسين

ما بين لوعة گلبي وادموع العين

ومن شبلك أنشد خويه عن گبرك وين

وعن گبر اخوك ورايته والچفين

من اليسر رديت

واشتد حناني

 

والگبرك اتعنيت

آه يا زماني

التقييم التقييم:
  ١ / ١.٠
 التعليقات
لا توجد تعليقات

الإسم: *
الدولة:
البريد الإلكتروني:
النص: *

 
شبكة المحسن عليه السلام لخدمات التصميم

Specialized Studies Foundation of Imam Al-Mahdi (A-S) © 2017