أقسام المكتبة الادبية
 قصيدة مختارة:
 البحث في المكتبة الأدبية:
 الشعر الشعبي

المقالات يا مظلوم إشلون أنساك

القسم القسم: الشعر الشعبي الشخص الكاتب: جابر الكاظمي التاريخ التاريخ: ٢٠١٧/١٢/١١ المشاهدات المشاهدات: ١٧٢٨ التعليقات التعليقات: ٠

يا مظلوم إشلون أنساك

جابر الكاظمي

يا مظلوم إشلون أنساك

صاحت زينب

 

وإشلون أتحمل فرقاك

قلبي إتعذب

وإشلون أتحمل فرقاك

 

زينب إجت من اليسر تجري الدمع واتنادي
هذي منازل كربله وهذا النهر والوادي
يالحادي نوخ بالظعن يم الأهل يالحادي
وبهيدة حط الراحلة ونزل بنات الهادي

صاحت يحسين أرد أنخاك

رايح مني

 

هاك إسمع قلبي اشناداك

غايب عني

وإشلون أتحمل فرقاك

 

 

 

امن الناقة طاحت للقبر لاجن تسيل العبره
تذكر إخوها ومصرعه وتذكر إدمومه ونحره
تذكر الخيل اللي إجت غايرة وسحقت صدره
عالغبره جسمه عافته ومن إجت لنه ابقبره

نادت ياالرحنه وعفناك

إتنادي وتنحب

 

للطف جينه وما شفناك

جبدي إتصوب

وإشلون أتحمل فرقاك

 

 

 

صرخات محموله ابحزن من قلب زينب تظهر
صاحت يمن فوق الترب عفتك خضيب امعفر
ابمصرعك عفتك وامزجت دمعتي ودم المنحر
فارقتك ونار الجبد مثل الخيم تتوجر

جارت دنيايه ودنياك

خانك دهرك

 

يالدهرك جار وعاداك

وانت ابقبرك

وإشلون أتحمل فرقاك

 

 

 

كلما تشب نار القلب أذكر لهيب إخيامك
كلما يصب جرح الجبد أذكر ادموع أيتامك
يبن أمي جيت أرد أنشدك عن نايبات أيامك
منهو الحفر بيده القبر ومنهو اللي جر إسهامك

عفتك متخضب ابدماك

اموذر شفتك

 

ومن يمك يسروني إعداك

طايح عفتك

وإشلون أتحمل فرقاك

 

 

 

سهم المثلث صوبك وإصوابه لسا يدي
وآنه يخويه امن اليسر سهم الشماته ابجبدي
مسبيه رحت او بالظعن حادي النوايب يحدي
ما جان تسبيني العده لو جان والي عندي

اموذر جسمك خليناك

فوق الهزل

 

خذت إعيالك وايتاماك

صرت أتنقل

وإشلون أتحمل فرقاك

 

 

 

هذا الجرالي من الدهر كل ساعه أمر ابنكبه
وشخلت بقلبي المحن دنيايه نوح وغربه
عقب الخدر رحت ابيسر هذا العليكم صعبه
واليوم إجيت ابعيلتك ونار الهضم ملتهبه

ابصوت امصابك ناديناك

حيلي اتهدم

 

مظلم هالكون ابلياك

هالكون أظلم

وإشلون أتحمل فرقاك

 

 

 

يالطحت مدمي اعله الثره دلالي مثلك مدمي
عنك يبو اليمه رحت والهضم يجدي ابهضمي
واليوم إجيت الكربله أجري الدمع يبن أمي
لو بالجبل هم القلب يزول الجبل من همي

منهو الشالك وإتعناك

ابدمعي اليذرف

 

وبقبرك منهو الواراك

ظليت أهتف

وإشلون أتحمل فرقاك

التقييم التقييم:
  ٠ / ٠.٠
 التعليقات
لا توجد تعليقات

الإسم: *
الدولة:
البريد الإلكتروني:
النص: *

 
شبكة المحسن عليه السلام لخدمات التصميم

Specialized Studies Foundation of Imam Al-Mahdi (A-S) © 2017